Google+ 彩妝造型師 0930-001031 新娘秘書 全省服務: 宋熙年撞鬼

2013年8月29日 星期四

宋熙年撞鬼

宋熙年撞鬼
宋熙年主持東張西望疑似撞鬼

踏入農曆七月鬼節,真係特別多神怪嘢發生,傳聞話啲「污穢嘢」最鍾意睇戲,電視城裏面亦發生過唔少鬧鬼傳聞,最經典當然係89年嗰單,有人喺清水灣電視城錄影廠見到一個模糊不清影像呆坐觀眾席,有人話係已故金牌司儀鍾保羅,搞到大家心慌慌。

睩大眼揮右手

大前日係農曆七月十四,傳說係鬼門大開嘅日子,負責主持《東張西望》嘅宋熙年突然喺直播途中,對住鏡頭做出怪異行為,當時佢同陳倩揚喺無綫將軍澳電視廣播城做直播,陳倩揚啱啱介紹緊下一個環節,喺拉闊鏡頭嗰陣,就影到宋熙年突然表情好奇怪,睩大雙眼矋住右邊,個樣好似好驚恐咁款,然後就打橫揮動右手,唔少網民猜測佢當時見到啲唔想見嘅嘢,但因為直播關係,惟有死撐!

噚日聯絡上宋熙年,佢笑咗幾聲,然後話個screen(屏幕)有問題,問佢係咪見到鬼?佢好淡定咁話:「唔係,只係平時地下個mon(monitor屏幕)應該係影住我哋做直播,但當時個mon就去緊廣告,我諗住提醒陳倩揚,我將會開聲講嘢,擔心兩個叠住講嘢就唔好。」但佢當時個樣好似好驚?佢解釋:「個動作好似怪咗啲,我阿媽同經理人事後都有問我發生乜嘢事,其實我只係想拍一拍佢(陳倩揚)。」
好彩宋熙年今趟時運高,乜都見唔到,但問佢驚唔驚?佢一副大無畏精神話:「唔驚,我都唔知係鬼節,呢啲嘢唔會唔信,但亦唔會太信,總之好彩自己未見過。」

沒有留言:

張貼留言